التسويق العقارى فى الإمارات

نشرت من قبل imohamedgomaa في

التسويق العقارى فى الإمارات

🏡التسويق العقارى بتحكمه ضوابط كتير بتكون مشتركة بين أغلبية الدول , و فى نفس الوقت بتحكمه أهداف واحده و محدده و هى ” البيع ثم البيع ” أهم حاجة عند كل شركات التطوير العقارى وشركات التسويق العقارى Brokerage Companies

و زى ما وضحت فى الجزء الأول من سلسلة التسويق العقارى إللى تقدروا ترجعولها من الينك ده
التسويق العقارى -مقدمة و نظرة عامة


شركات العقارت إللى بتكون أكثر تواجدا سواء بالأنشطة التسويقية أو عددهم و منافستهم فى السوق هى شركات التسويق العقارى .

و فى المقال ده هعرض ليكم ملخص تجربتى فى السوق الإماراتى فى مجال العقارات.

أنا إشتغلت فى السوق الإماراتى سواء بإستهداف المصريين المغتربين هناك لشراء وحدات سكنية فى مصر أو إستهداف الإمراتيين لشراء وحدات بالمشاريع الإمراتيه فى مختلف الإمارات.و أيضا عملت على خدمات تأجير عقارى مشابهه لخدمات Airbnb .

و ملخص إللى نقدر نقوله إن ضوابط السوق هناك مختلفة تماما عن السوق فى مصر , أبسط شئ إن السعر بين كل الشركات بيكون واحد و صعب شركة Brokerage تقلل من سعر الوحده بغرض المنافسه أو زيادة المبيعات.

و هنا ممكن حد يسأل سؤال إزاى أصلا شركة وسيطة تقلل سعر الشقة أو الفيلا و المطور العقارى هو إللى بيحدد السعر ؟؟

الإجابة هى إن الشركات دى بتبيع مقابل نسبة من ثمن الوحده و النسبة دى هى إللى بتتقسم على ( خدمات إعلان و تسويق + عمولة السيلز إللى تم العملية + مصاريف الشركة ) و الباقى بيكون هو صافى المكسب للشركة .

هنا الشركة ممكن تقبل بتقليل نسبتها النهائية من البيع مقابل إنها تبيع أكثر أو بغرض الحصول على مميزات أخرى من المطور مقابل عدد معين من عمليات البيع .


لكن الوضع فى السوق الإماراتى مختلف تماما و هى إن صعب شركة تعمل ده , بجانب إن هناك يوجد تنوع فى الوحدات و ده بطبيعة المدن المختلفة يعنى مثلا الطبيعى هناك إنك تلاقى ” إستديوهات ” كتير فى كل المشاريع و دى إللى بتكون أقل سعرا طبعا .
و بتكون مطلوبة بنسبة كبيرة بسبب توافد الكثير من المغتربين للعمل أو السياح .

و تواجد تنوع فى الوحدات و أسعارها و أنظمة السداد المختلفة بيقدم فرص بيع مختلفة.

و مع قوة بعض المدن زى الإمارات و أبو ظبى و الشارقة بيقدم حلول كتير لأى مسوق عقارى .
مهم جدا عند عملك على السوق الإماراتى زى أى سوق تانى إنك تدرس السوق كويس و تبقى عارف طبيعة الدولة بشكل كويس
يعنى مثلا معلومة إنك مثلا تعرف إن مدينة زى أبو ظبى مستواها المعيشى يعتبر أعلى من دبى أو بمعنى أصح الشريحة من السكان هم الـ A Class أكثر من دبى و إللى بتعتبر مدينة عملية أكثر هتفرق معاك كتير .


فى الإمارات مش كل الوحدات يمكنك شرائها !!!!

اه فعلا إنت كمصرى مش هتقدر تشترى أى عقار فى الإمارات و ده لأن فى مشاريع معينة بس هى إللى بتسمح للتملك للأجانب سواء مصرى أو سعودى أو إنجليزى أو هندى .
و دى بتعتبر ميزة للمشروع , لأنك فى الحالة دى هتقدر توسع من الشريحة المستهدفة ليك فى الأسواق المناسبة .

يعنى لو قدرت تعرض مميزات الإستثمار العقارى للسعوديين كمثال و مميزات تملك عقار فى دبى مثلا هتقدر تزود فرص الوصول لـ Qualified Leads و إللى بالتبعية بيزود من فرص إتمام عمليات بيع ناجحة .

أهم حاجة لازم تعملها و ما ينفعش تتغاضى عنها هى إنك تسمع كلام العميل بتاعك بشكل مفصل جدا جدا جدا خاصة لو بتشتغل معاه عن بعد .
يعنى لازم تعرف منه تفاصيل المشروع بكل تفاصيل و أهم المميزات فى المشروع و أهم نقطة لازم تسمعها من العميل بتاعك هى وجهة نظره و يا ترى شايف مين أفضل عميل يشترى منه .
و جهة نظر و رأى عميلك فى الجزئية دى بتفرق كتييير جدا بجانب طبعا خبرتك فى الشغل

بعد عرض نبذات سريعه على طبيعة السوق العقارى فى الإمارات بنوصل هنا لأفضل طرق التسويق العقارى فى الإمارات .

أول حاجة إن بطبيعة السوق الخليجى بنعتبر إن الإنستجرام هو أولى و أفضل المنصات إللى هنستخدمها , بجانب اليوتيوب و ممكن سناب شات .

بتكون ميزة إضافية لكل شركه إن يكون ليها موقع خاص بيها و يكون فيه كل مشروع بتفاصيله. بجانب الواتس أب إللى بيكون ليه تأثير قوى جدا لو تم إستخدامه بالشكل المناسب.

و ده بيكون متحدد بشكل مفصل فى الخطة التسويقية و إللى بيفضل تكون ربع سنوية , يعنى إنت كمسوق لازم تعرف إيه هى أهم المشاريع إللى هتشتغل عليها لمدة 3 شهور علشان تبدأ تحدد إيه هى المنصات المناسبة لتسويق كل مشروع حسب المعلومات المتوفرة و حسب أيضا الميزات المتاحة بكل مشروع .

أتمنى تكون المعلومات دى تكون مفيدة ليكم و تكون وضحت حاجات جديدة بالنسبة لسوق جديد و قوى .

تابعوا المقالات الجديدة عن التسويق العقارى هيكون فيها معلومات مهمة إن شاء الله
تقدروا ترجعوا للأجزاء إللى فاتت من هنا

⬅️الجزء الأول – مقدمة و نظرة عامة على السوق العقارى
⬅️ الجزء الثانى – القنوات التسويقية فى التسويق العقارى


0 تعليق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

WhatsApp chat