احب أكتب ليكم البوست ده … ” بوست عميق فى التسويق “

البوست طويل و فيه تفاصيل كتير … يعنى ياريت لو نويت تقرأه ياريت تركز

بداية الموضوع كده تعرف أن ” التسويق ” مش خطوة واحدة أو جزء واحد علشان كده بتسمى العملية التسويقية … يعنى فيها تفاصيل و خطوات و حاجات كتير

فأول لما تفكر أن التسويق ده سهل و مش متعب يبقى ياريت تفكر تانى !!!!

التسويق مش علم الواحد أتنين تلاته ، التسويق علم الفهم و التطبيق ، لأن لو الكل أتعامل معاه بمنطق الخطوات و الأنماط الثابته هيخرج بره منطقة الأبداع و إللى هى أصلا قلب التسويق ، هتكون مسوق شاطر لو تقدر تفهم ده ليه حصل و حصل أزاى و كان ممكن يحصل أحسن من كده أزاى و أزاى برضه نطور من إللى حصل ده .. طبعا فى قواعد أو مفاهيم ثابته بتسهل من العملية ككل بس أنا شخصيا مش مايل ناحية أننا نتعلم التسويق كنقط أو خطوات ثابته ورا بعضها… #التسويق_حاله_مش_مجرد_شغلانه

أتعامل مع التسويق على أساس أنها عملية أيصال خدمة أو فكرة أو منتج أو قيمة ما إلى شخص أخر أو إيجاد الطريقة المثلى لأيصال هذه الخدمه زى دور سواق التاكسى بالظبط المفروض ياخد باله منك و من العربيه و من الطريق و فى نفس الوقت يحقق هدفه و هو الأجره

التسويق برضه ده عامل زي لعبة الكوتشينة

بيتاح ليك اللعب بمجموعة من الورق ( أمكانياتك و قدراتك ) و حسب طريقة لعبك و تركيزك و خططك بتقدر تجمع أكبر قدر من الورق ( الربح ) من الناس إللي بتلعب معاك (المنافسين )

و عامة المكسب في التسويق بيعتمد علي :

-الغاية

-الوسيلة

-الطريقة

-الفكر

في التسويق أنت بتعمل زي القهوجي و هو أنه بيقدم منتجه أو خدمته

( و هي المشاريب ) و عليها قيمة أضافية و هي الفرفشة و الصحبة و قهوة عن قهوة تفرق و كل شوية يضيف في صفات تنافسية بينه و بين منافسيه زي مثلا أنه يجيب شاشة عرض أكبر أو أنه يضيف أنواع مشاريب أكتر و هكذا …. علشان كده دايما بقول ” التسويق حالة مش مجرد شغلانة

برضه التسويق عامل زي تربية الحمام

أنت لما بتسوق لمنتجك كأنك بتربي حمام ( الزبون ) بتفضل تأكل فيه و تدلع فيه و تراعيه و كل ده علشان بس لما يطير و يلف مهما يلف يرجعلك تاني

كل إللى فات ده تعاريف أنا شخصيا بحب أعرف بيها التسويق لأى حد !!

و هتلاقى من أساسيات أى عملية تسويقية أنك بتعمل أستراتيجى و بتعمل خطط و أبحاث تسويقية تحليلات للسوق علشان تقدر تحدد أن هتشتغل أزاى

الناس إللى بتعمل الكتب بتاعة التسويق أو بمعنى أصح الناس التقيلة فى التسويق

ثبتت أن فى حاجة أسمها المزيج التسويقى – Marketing Mix

و إللى هما ال 4Ps ( السعر , المنتج , المكان , الترويج )

يعنى أيه المزيج التسويقى ؟؟؟

هو العناصر التى يتم على أساسها تحديد الأستراتيجية التسويقيه للشركه أو للمنتج

و كان ينحصر المزيج التسويقى بين أربعة عناصر لذا كان يطلق عليها ال

4Ps

( product , Price , promotion , Place)

المنتج Product : و هو ما يتم تقديمه للمستهلك من منتج ملموس

( شئ مادى ) أو خدمة ( شئ معنوى أو غير ملموس )

السعر Price : و هو ما يتم دفعه مقابل الحصول على المنتج أو الخدمه

الأعلان Promotion : و هنا نقصد كل وسائل الاعلان و نشر منتجك أو خدمتك على العامه , مثل الأاعلان فى التليفزيون و الصحف و الراديو , و التسويق على الأنترنت , أو الأاعتماد على العلاقات و المعارف …. بأختصار شديد ,,, هو أنك تستخدم كل الوسائل المتاحه لنشر منتجك و إعلام الناس به .

المكان Place : المقصود هنا هو المكان الذى تقوم فيه بنشر منتجك أو خدمتك و تحديد قنوات بيع المنتج

و بسبب التطور فى علم التسويق و ظهور وسائل نشر جديده و تقنيات حديثه تسهل العمليه التسويقيه ككل

تم أستحداث المزيد من العناصر و التى تم دمجها مع العناصر الرئيسية للمزيج التسويقى و هى

( Purpose , People ,Processes Philosophy , Packaging )

السبب أو الغايه Purpose : إذا كنت لا تعرف لماذا تسوق هذا المنج أو هذه الخدمه فكيف ستسوق لها ؟؟؟ معرفة الغرض من العملية الستويقيه يساعدك على تحديد الفئة المستهدفه من حيث الأعمار أو الجنس أو المنطقة و الدولة .

و هذا العنصر يأخذنا إلى العنصر الأخر و هو

الناس People : و يقصد هنا المستهلك أو العميل أو الشخص الذى يقوم بالعمليه النهائية و هى شراء و أستخدام المنتج أو الخدمه , و أحيانا لا نستطيع تحديد رد فعل العميل بسبب عدم وجود معلومات حول رضاء أو عدم رضاء العميل على المنتج لذا تقوم بعض الشركات الأن ضمن #الأبحاث_التسويقيه بالكشف عن رضاء أو عدم رضاء العميل و ما هى معدلات الرضا عند المستهلك بشكل عام , و ما هى أفكار العملاء حول تطوير المنتج ,,,,, بهذه الطريقه تصبح الشركه قريبه جدا من المستهلك و هنا يسهل التنبؤ بتصرفات الناس و يسهل أنتاج منتج ينال أعجابهم و يحقق الربح المادى أيضا .

العمليه Process : هنا نقصد الإستراتيجيه أو الطريقه التى تدخل بها السوق , و الأستراتيجية التى ستدير بها العمليه الأنتاجيه ككل من بداية التصنيع حتى بيع المنتج فى أماكن البيع و قنوات البيع المختلفة و التى تعد احد عناصر المزيج التسويقى كما ذكرنا من قبل .

الفلسفة Philosophy : لا نقصد هنا الفلسفة بمعناها المتادول أو الفلسفة كعلم ,,,,, و لكن نقصد هنا الفلسفة الخاصة بالشركة و الفكر الخاص بها ,,, فكثير من الشركات تسوق منتجاتها حتى تنشر فلسفة أو فكر معين ,,, و تقوم أيضا بالقيام بأعمال مختلفة لترسيخ هذه الفلسفة

فلكلا منا فلسفته و فكره الخاص به و ميزة هذا العنصر أنه إللى حدا كبير يجعل الشركه و المنتج فريدا من نوعه بين المنتجات الأخرى المنافسه فى السوق .

التعبئه ( طريقة العرض ) Packaging : و هنا نقصد طريقة عرض المنتج أو الخدمه سواء كان هذا المنتج شئ مادى و ملموس أو خدمه

مثال : أذا كنت تدير شركة تقدم خدمه على الأنترنت فكيفية عرض خدمتك و شكل الموقع و الصورة التى تظهر للعملاء هذا هو ما نطلق عليه التعبئة أو طريقة العرض و يتم تحديد نوع التعبئه أو طريقه العرض حسب المنتج و حسب الفئه المستهدفه حتى تقنع العميل بالمنتج أو بالخدمه

العناصر الأربعة الأساسية مش بتمنعك أنك تستخدم عناصر مكملة أو توضيحية بس لازم نفهم كل جزء و نعرف هنستخدمه أزاى

طيب بعد كده كل ده أيه علاقة ده بفهمك للتسويق أو شكل التسويق فى مصر

ممكن تسأل نفسك سؤال كده ….. أحنا فى مصر بقى شغالين فى التسويق ده أزاى أو نقدر نقول فى ناس كتير بتتعامل مع التسويق أزاى ؟؟؟

إحنا حتى الأن فى ناس كتير جدا بتلخص التسويق فى عملية ” الترويج ” فقط يعنى بمجرد أعلان بس

على الرغم أن فى عمليات و تفاصيل تانية بتحكم العملية التسويقية , التسعير مش سهل , شكل المنتج و صفاته تحديدها مش سهل , تحديد المكان المناسب أو الشريحة المناسبة لمنتجك مش سهل , انك تعمل خطة تدير بيها البيزنس بتاعك مش سهلة

لأنك لازم تبقى عارف أنت هتعمل أيه بالظبط

يعنى ممكن تلاقى واحد صاحبك جاى يقولك …. أنا عندى حتة فكرة أعلان لكوكاكولا يخلينا نعمل ماركتنج للصبح …!!!!

و هنا المفروض يجيلك حالة صمت و ذهول …. و تسأله تقوله هنعمل ماركتنج لأيه !؟؟

و هو التوسيق مجرد أعلان يتعمل و خلاص …. مش لازم الأعلان ده يكون بيخدم فكرة أو هدف معين !!

ممكن تكون الفكرة جامده بس مش وقتها أو مش مناسبة للشركة

و علشان تنجح فى التسويق لازم يكون صوتك

( مؤثر ، عالى ، قائد ، مميز )

و هو ده المهم فى التسويق

يعنى مثلا إحنا قاعدين و سط ناس و كل واحد بيكلم إللى جنبه ساعتها هيبقى فى نوع من اللغط و الدوشه ،و ساعتها برضه علشان تتكلم و الناس تسمعك و تهتم بكلامك لازم يكون الناس عندها أستعداد أنها تسمعك

مثلا يعنى يكونوا عارفين قبل كده أو أنك تعمل حاجة تخليهم يركزوا معاك

حتى لو أنك تتشقلب !!

و المدلولات دى و إللى ممكن تطبق على أى حملة تسويقيه أو أى نشاط تسويقى !!

و من المدلولات دى ……

تقدم حاجة جديدة ( يعنى تقدم خدمة أو منتج جديد )

تقدم شغلك ده بقى بطريقة جديدة

تكسب أنتباه الناس

تستغل أنتباه الناس و تقدم خدماتك و شغلك فى اللحظة المناسبة

صوتك هو أدائك التسويقى يعنى أدائك التسويقى يكون ( مؤثر ، عالى ، قائد ، مميز )

فى الأخر علشان لازم تكون بعد ما قرأت كل الكلام ده تكون فتحت عنيك شوية أن الموضوع مش مجرد أعلان

دى شوية أفكار و وجهات نظر شخصية عن التسويق ياريت تقرأها بأهتمام

أول حاجة التسويق مش هو أنك تفكر فى فكرة أعلان لبيبسى ولا لفودافون , التسويق هو أنك تقدر تحقق الأهداف الخاصة بالشركة بكل الطرق الممكنة سواء بأعلانات , علاقات , تطوير , تدريب

التسويق مش أونلاين بس , يعنى إللى يقولك أن التسويق دلوقتى رايح ناحية الأونلاين … قوله أنسى … التسويق عملية كاملة متكاملة , فعلا و ده أكيد أن الأونلاين بيتميز عن الأوفلاين بحاجات كويسة زى التكلفة مثلا أو مجهود الشغل … بس لو بتفكر على نطاق واسع و على نطاق الشركات الكبيرة … ساعتها هتلاقى أنك لما تعمل شغل أوفلاين بتركيز بيكون ال ROI بتاعه أعلى

الفيسبوك مش هو برضه أفضل وسيلة للتسويق أونلاين !!! أه أنت المفروض بتختار إللى يناسبك .. هو ممكن يكون الأسهل و الأرخص … بس ده مش هيفضل على طول و أفتكر عن زمن أنك يكون عندك موقع خاص بيك أو بشغلك ده ماخلصش و هيرجع بقوة

أى أستراتيجى أو خطة تسويقية لازم تتعمل بتركيز و تاخد وقتها … لأنها مش مراجعة ليلة الأمتحان هتجهز كلمتين تدخل تكتبهم فى ورقة و خلاص …. ده عمر و نجاحات هتعيشها يا أما بلاوى سوداء أنت إللى هتتحمل نتيجتها

التسويق تانى هو عملية … يعنى مش بمجرد ما تبدأ فيها أعرف أنك مش هينفع تخرج منها إلا لو قررت أنك تفشل

لو عايز تبدأ تشتغل فى التسويق فعلا و عايز تعرف بقى تدخل المجال ده أزاى ده بقى خطوات و حاجات هتفيدك بأذن الله

1- أبدا اعرف هى أيه الوظائف إللى فى التسويق و أيه هى أقسامه و ايه منها إللى يناسبك و شوف الشركات إللى بتعلن و عايزه ناس تشتغل فى التسويق بتبقى طالبه أيه … و هل أنت عندك المهارات دى ولا لأ

لو عندك أى سؤال أو إستفسار تقدر تكتبه فى كومنت و هرد عليك على طول