الكرياتفيتشى

الكرياتفيتشى أيوا زى ما أنت قريتها كده أو الأفكار المطرقعة 
الأثنين بنفس المعنى إللى مالوش معايير , و أصبح موضه أى حد بيطلبها و بينسبها لنفسه بدون أى سبب.
الCreativity مش مجرد ألوان كتير فى صورة أو ديزين متركب على بعضه تركيبه صعبه و خلاص
و الأفكار المطرقعة مش إنك تجيب كلب برأس قطه و تقول انا فنان .
 
مشكلة ال creativity فعليا إنها سلعة غير ملموسة يعنى لنا تبيعها كأنك بتبيع الهوا بالظبط ….
فى الأول نتكلم عن الكرياتفتى من وجهة نظر شركات التسويق أو الفرى لانسر, و إللى فى منهم كتير دلوقتى بيسيئ إستخدام للكلمة و بيقولها فى أى مقابلة أو حوار بينه و بين العميل , و أوقات كتير بيستغل جهل العميل أو قلة معرفته ( و دى حاجة مش عيب إن العميل يكون مش عارف )
 
بس الفكرة كلها إنك لما بتحط معلومة أو جملة فى غير مكانها يبقى إنت كده بتضلله و ده بيضر بيك و بالسوق بشكل عام على المدى البعيد.
لان العميل لما هيلاقى إن حد بيقوله أنا هعملك شغل كريتف و يشوف الشغل يلاقيه ( سمك لبن تمر هندى ) هيبدأ يتبنى عنده حالة كبيرة من فقدان الثقة لكل الناس إللى شغالة فى المجال , بجانب إنه مش بيطول شغل معاك
يبقى بلاش مبدأ اعمله من البحر طحينه و خليك قد كلمتك , الكرياتفيتى ليها شروط ممكن توفرها فى النص المكتوب أو الصورة أو التسلسل أو الكرياتفيتى فى تحديد الفئات المستهدفة و إللى بيترتب عليه إنك هتحقق نجاح أضمن و أسرع
بس مع إنى فى الجزئية بتاعة الأفكار المطرقعة دى بلوم فيها الشركات ,
بس برضه إنت كعميل أو كصاحب بيزنس إيه هو تعريفك للكرياتفيتى أو الأفكار اللى ما حصلتش ؟؟
إنت لازم تكون محدد إنت عايز إيه بالظبط و لو مش عارف تحدد ممكن تسيب مساحة للى بيقدملك خدمة التسويق إنه يحددلك… مش عيب صدقنى.
 
و مش شرط برضه يكون البيزنس بتاعك محتاج أفكار مطرقعه فى الديزين على قد ما هو محتاج أفكار مطرقعه فى جزئية تسويقية تانية .
و لازم نسأل السؤال المهم أنت كصاحب بيزنس تعرف هل العملاء بتوعك هيناسبهم أى نشاط تسويقى ؟
هيناسبهم أى فكر فى الأعلان؟
 
يعنى مثلا المطاعم و الكافيهات , ده مثلا مجال بيعتمد بنسبة كبيرة جدا على كل ما هو مرئى ( صور و فيديوهات ) طيب إزاى بقى نعمل عملية تسويقية ناجحة من غير ديزين واو و مطرقع؟؟؟ 
 
يعنى لو هتشوف أى نشاط تسويقى لأى براند أكل أو مطعم كبير هتلاقى إن الإعلان بيكون معتمد على فكرة فعلا creative بس فى المعنى بتاعها مش شرط الديزين الخارق للطبيعة .
 
الإبداع فى التسويق غير مربوط نهائيا بصعوبة الديزين أو صعوبة فهم الفكرة و إن فكرة الإعلان ( أو البوست لو هنتكلم على السوشيال ميديا ) الإبداع إللى بجد إن الفكرة يكون ليها معنى و متوظفة صح .
 
الإبداع إنك ممكن تصمم موقع يكون جذاب بشكل معين للعملاء بتوعك و الموقع ده يساعدك إنك تزود أرباحك .
👈 ملحوظة بس سريعه فى الأخر … ياريت نفرق بين أنواع الأنشطة التسويقية إللى ممكن تقوم بيها للبيزنس بتاعك و مش أى حاجة تبقى بوست على السوشيال ميديا و إعلان ممول … ممكن البيزنس بتاعك علشان ينافس يستخدم قناة تسويقية تانية غير الفيسبوك , أو تستخدمه بشكل مختلف عن المنافسين بتوعك و هنا هتبقى بدأت تبدع , #التسويق_حالة_مش_مجرد_شغلانه

Leave a Comment

Your email address will not be published. Required fields are marked *