الثلاثى الهجومى لأى براند

كأنك بتلعب كورة بالظبط هتحتاج تدافع و تهاجم , و فى التسويق علشان تقدر تاخد مكانه أكبر و أقوى فى السوق لازم يكون البراند بتاعك قوى !!

دى فى الغالب جملة ممكن تكون شوفتها فى أماكن كتير بس هو أصلا يعنى أيه ” براند”

نقدر نقول أن كلمة ” براند ” تصنف على أنها ( حالة ) مش ( صفة )

يعنى هى بتكون العلاقة بينك و بين العملاء بتوعك و على مدى تبادل المنفعة بينك و بينهم

فى تاريخ التسويق أختلفت المراحل بين تفضيل كمية الأنتاج عن أحتياج السوق و بين أحتياج السوق و قدرة الشركة على الأنتاج لحد ما وصلت أن إللى العميل عايزه نعمله و نحافظ على العميل ده بكل الطرق

بس الجزء ده نقدر نلخصه فى كلمة ” Branding ” و ممكن نشرحها و نقول Branding يعنى الزبون شايفك أزاى

Branding يعنى أنت الترتيب رقم كام فى أختيارات العميل لما يحتاج خدمة أو منتج أنت بتقدمهم

✔️ Branding الفرق إللى بتعمله فى حياة العميل بتاعك و بتخليه مش عارف يستغنى عنك

✔️ Branding هو الفرحة إللى فى كوكاكولا و القوة إللى فى فودافون و سرعة الدليفرى فى ماكدونالز مش المياه الغازية أو خطوط التليفون أو الأكل

✔️Branding هو أنك كل لما تروح السوبر ماركت تشترى شوكلاته تشترى KitKat حتى لو أغلى من أنواع تانية بس لأنك بتحبها ( و ممكن تكون واصلة عندك أنها هتخليك تاخد بريك ;D )

بس علشان تلعب كرة صح و تهاجم صح و يبقى البراند بتاعك قوى فعلا هتحتاج 3 مهاجمين تدخل بيهم على أى سوق أو أى منافس

دول حاجة زى هجوم برشلونة فى عزه كده ( نيمار و ميسى و سواريز ال MSN )بس المهاجمين بتوع البراند أسمهم STP

? Segmentation+Targeting+Positioning ?

?يعنى ايه Segmentation ؟

هى عملية تقسيم السوق لشرائح , و السوق ده بيضم منافسين و عملاء و أنت على الأساس ده بتقسم كل منافس مع إللى شبهه و كل عميل أو زبون مع إللى شبهه علشان تعرف و تحدد أيه إللى هما محتاجينه بالظبط و أزاى تقدرتعمل إللى يخليهم مبسوطين

و فى تقسيم العملاء بتقسمهم بناء على شوية عوامل

? Geographic segmentation

دى حاجة كده زى التوزيع الجغرافى بتاع الثانوية العامة

( لما كان كل طالب مصرح ليه يدخل كلية معينة حسب عنوان سكنه )بس فى التسويق و لما تيجى تعمل براند قوى هتحتاج تفهم الناس صح

بيكون التقسيم هنا حسب المكان إللى العملاء بتوعك عايشين فيه بتحدد أعمارهم , و نوعهم و ديانتهم علشان أكيد لو هتفتح محل مثلا بيبيع لعب أطفال فى مكان معدل الأعمار فيه أكبر من 15 سنة يبقى أكيد أنت كده هتخسر

? consumer segmentation

التقسيم هنا بيكون بناء على تطلعات المستهلك !!

يعنى بعد لما بتتقسم السوق حسب المكان و السن بتحدد أيه هى تطلعات و الحاجات عند المستهلك فى المناطق دى

? Behavioral segmentation

التقسيم هنا بيكون للناس حسب تصرفاتهم و طباعهم و سلوكهم الشرائى مثلا , يعنى لو أنت بتبيع سلعه يومية و بتحتاج أنها تتباع طازة كل يوم

بس المنطقة إللى أنت فيها الناس بتحب تشترى حاجات بالشهر و مش بتهتم بالحاجات اليومية دى فأنت كده بتخسر فرص كتير

سلوك الناس مهم جدا ليك كواحد عايز تستهتدف ناس و سوق صح

? Psychographic segmentation

التسويق عامة مرتبط بشكل قوى جدا مع السيكولوجى و لما تيجى تقسم السوق بتاعك بتحتاج تقسم الناس حسب سيكولوجية كل واحد فيهم و تعرف أيه إللى بيأثر فيهم أكتر علشان تشوف لو ممكن تستخدم ده ولا لأ ,

و إيه مثلا البرامج إللى بتأثر فيهم أو بتفرحهم يعنى مثلا لما كان موجود برنامج ” البرنامج ” بتاع باسم يوسف و كان بيضحك الناس فكان طبيعى لو أنت عايز تنزل بأعلان المنتج بتاعك هتنزله فى الفترة إللى الناس كلها متجمعة على البرنامج

السيكولوجى سلاح فتاك خلى بالك منه !!!

? Occasional segmentation

لو أنت هتفتح مطعم أو كافيه فى منطقة الناس إللى فيها مش متعودة لما تخرج تقعد فى كافيه أو تأكل فى مطعم يبقى أنت بتخسر برضه ناس كتير

التقسيم ده بيساعدك تفهم دماغ الناس دى تجاه الأحداث المتنوعه

? Cultural segmentation

الثقافة ….. الثقافة ….. الثقافة

ثقافة أى شعب أو أى مجتمع هتفرق كتير فى شغلك يعنى لو بتفكر و تخطط و تعمل فريق عمل علشان تعمل كورس للطبخ أكيد مش هتروح تعمله فى الصومال !!الناس دى مش فى ثقافتهم أنهم يطعلموا يطبخوا لأنهم أصلا مش لاقين يأكلوا

الألوان مثلا بتفرق حسب ثقافة كل شعب , الحركات برضه بتفرقيعنى اللون الأسود فى بعض الأماكن يعنى الوقار بس فى أماكن تانية زى عندنا كده فى مصر رمز للحزنيبقى و أنت بتقسم السوق بتاعك أفهمهم صح و أعرف ثقافتهم صح علشان تعرف تقدم إللى يناسبهم صح

بعض الكلام ده كله أحنا يادوب أتكلمنا على مهاجم واحد بس من ال 3 مهاجمين بتوع البراند إللى هما أسمهم

STP

Segmentation+Targeting+Positioning

? الTargeting دى بتكون خطوة سهلة جدا لو أنت عملت Segmentation صح علشان هى بتكون أنك بعد ما بتقسم السوق و المنافسين كويس و تفهمهم كويس بعد كده بتستهدف مجموعة منهم إللى أنت شايف أننهم مناسبين ليك و أنت مناسب ليهم

يعنى فى الخطوة دى بيكون ليك الإختيار … بس خلى بالك لو أختارت غلط …. أنت حر لأن النتيجة مش هتكون كويسة

? أخر مهاجم معانا علشان نكمل الخط الهجومى للبراند هو ال Positioning

و علشان ال Positioning أصلا ليه Techniques كتير احنا هنتكلم عنه فى العموم و أنت و شطارتك مع البراند بتاعك بقى …. ما أنت المفروض بعد كل الكلام ده تكون عرفت أزاى تبدأ البراند بتاعك

ال Positioning بقى هو أنت فين من أختيارات الزبون بتاعك

يعنى مثلا بالنسبة للحاجة الساقعة ياتارا أول لما الواحد بيجى يفكر أو نفسه يشرب حاجة ساقعة ياتارا أول حاجة بتيجى فى دماغة بتكون PEPSI ولا Coca Cola

يعنى برضه لما بتفكر فى القوة بيكون إللى فى دماغك فودافون ولا الجيم إللى جنب البيت عندك زى مثلا المثال المشهور بتاع أن عربيات فولفو مشهورة بالأمان و السلامة و سيارات Audi أنها سيارات رياضية , سيارات فرارى بأنها سيارات سريعة

ال Positioning مش معناه أن يكون عندك حاجة واحدة بس تعلق مع الناس …… خالص بس هو معناه أن يكون عندك ميزة أو قيمة معينة بتقدمعها للزبون و تكون بتقدمها بشكل مختلف و أحسن من أى منافس لدرجة أن لما يفكر فى الحاجة دى يفكر فيك على طول !!!

حتى لو ما أستخدمش المنتج بتاعك قبل كده

فمثلا هتلاقى مثلا لو واحد بيسأل واحد صاحبه أنه عايز يلاقى مكان كويس يأكل منه أكل بيتى و مش مهم السعر أوى بس يكون المكان و الأكل نضيف

صاحبه ده فى الغالب ممكن يقوله جرب أكل ” حجوجه ” على الرغم أنه ممكن يكون ما أكلش من هناك خالص

بس فى Positioning بين أكل البيت و بين مطاعم “حجوجه ” و زى برضه الكشرى مع ” سيد حنفى ” أو ” أبو طارق “

ال Positioning هو إللى بيتطور بعد كده و بيعلى ال Awareness بتاع الناس تجاه المنتج بتاعك

? إعتبر نفسك دايما زى مدرب الكورة مهمتك تكسب عن طريق أنك تلعب باللاعيبه بتاعتك كويس و بالنسبة للثلاثى الهجومى بتاعنا ال STP لازم تلعب بيهم مع بعض علشان تعرف تجيب جول و تفضل فى صدارة إختيارات عملائك. ??

لو المحتوى عجبك و لقيته #كونتنت_يستاهل .. ممكن تعمل شير ?

Leave a Comment

Your email address will not be published. Required fields are marked *