إزاى تذاكر Media Buying

فى ناس بدأت الدخول فى مجال الـDigital Marketing عن طريق تخصص معين وكملت فيه و فى ناس جربت حاجات كتير لحد لما إستقرت على التركيز على حاجة معينه

و انا عن نفسى جربت أعمل حاجات كتير بإيديا من أول الرد على العملاء و الكومنتات و شغل ال moderation بشكل كامل مرورا بالتصميم و و إنشاء محتوى و إدارة الأعلانات

و كل جزئية فى الديجتال ماركتنج ليها طريقة مذاكرة أو تطوير خاصة بيها تقدر تطور من نفسك بيها بأفضل صورة

أخر سنتين جزء كبير من شغلى و تركيزى بقى فى الMedia buying سواء مذاكرة أو كورسات أو أى حاجة ممكن تطور مهاراتى فى الجزئية دى

و علشان أقدر أذاكر بشكل سليم عملت نظام بسيط كده يقدر يسهل عملية مذاكرة أى منصه إعلانات جديدة و فى نفس الوقت يسهل عملية التطوير

هوضح كل ده فى خطوات علشان يبقى سهل التطبيق

أول خطوة هى تحديد المنصات إللى محتاج تذاكرها و هنا لازم تختار إللى إنت محتاجه فى تنفيذ شغل ضرورى و الباقى هنبدأ فيه بعد كده و كل المنصات تعتبر متشابهه بنسبة كبيرة فى التكوين الأساسى ليها يعنى لو بتعرف تعمل إعلانات على فيسبوك أو إنستجرام هتقدر بسهولة تفهم الDashboard بتاعة سناب شات أو تيك توك

و هنا نحدد إيه هى مكونات كل منصة إعلانات

ال algorithm الخاص بالمنصه

أنواع المحتوى المناسب

ال Placements

أنظمة الbidding & Budgeting الموجودة

الـ Objectives المتاحه فى المنصه أو الموقع

تانى خطوة هى تحديد الإستراتجيات المناسبة و هنا ممكن تكون إنت جربت افكار قبل كده بس يفضل دايما تتوسع و تدور و تشوف أفكار جديدة لأن سلوك الناس بيتغير و الplatforms دى ذات نفسها نظامها بيتغير بإستمرار

ثالث خطوة هى تحديد طرق الـ Tracking & reporting إللى هتقدر تستخدمها مع كل Platform

اول حاجة لازم تحددها هى إن الاساسيات الخاصة لكل منصه موجوده على المنصة ذات نفسها أو فى فيديوهات على اليوتيوب

لكن دايما إللى انا شخصيا ممن أستثمر فيه و اخد فيه كورسات عادى جدا هى الكورسات إللى هتقدملى أفكار و إستراتجيات جديدة.

لأن من أهم مميزات مجال الديجتال مراكتنج هى إنك تقدر ترفع من مستوى خبراتك بقوة الناس إللى إنت بتتعلم منهم يعنى لو إتعلمت من 10 مميزين إنت كده كأنه بقيت بقوة 10 أشخاص و هكذا..

المهم طبعا تنفذ بإيدك أكثر و أكثر علشان التطوير بدون تنفيذ زى إللى بيتعلم العوم على البر كده من غير ما ينزل المياه

نرجع لل5 أقسام إللى قولنا هنقسم مذاكرتنا عليها

أول حاجة إللى هى ال algorithm و هنا بتفهم إزاى البوستات بتظهر للناس و بيتم تقييم المحتوى إزاى علشان ده هيساعدك فى الخطوات إللى جايه و أهمها جزئية المحتوى

انا بحب دايما أدمج جزئية الalgorithm مع الPolicies الخاصة بكل منصه لان الأتنين دول مع بعض هيوفروا عليك وقت كتير

خاصة فى الفيسبوك إللى ممكن يقفلك أكونت علشان إتنفست بصوت عالى مثلا

مثال مثلا سناب شات ممكن يرفضلك إعلان بسبب جودة الفيديو أو المحتوى إللى إنت مستخدمه يبقى نأكد تانى إن جزئية الalgorithm و الPolicy هما عينك إللى هتشوف بيها شغلك و ترتبه صح

تانى جزئية و هى أنواع المحتوى المناسب و هنا لازم تتعامل مع المحتوى كأنه سلاحك إللى بتضرب بيه هو المطرقه إللى بتخبط بيها على أبواب النتائج المتميزة

الفيسبوك و إنستجرام مناسب ليهم جدا الصور و الفيديوهات لكن التيك توك و سناب شات طبعا الفيديو هو رقم واحد فيهم

دى معلومات تعتبر بديهيه لكن نوعيه المحتوى الفيديو لكل منصه هتختلف عن التانية يعنى على التيك توك لو بتفكر تستخدم فيديو مدته طويله نتيجته مش هتكون مضمونه زى نفس الفيديو على الفيسبوك

إستخدامك لموسيقى أو أغانى على التيك توك مش هيكون مرهق لحقوق الملكية زى الفيسبوك مثلا

و دى مجرد أمثله من ضمن أمثله كتير مالهاش حصر لطرق إستخدام المحتوى لكل منصه و حسب كل حملة و كل هدف إنت شغال عليه و طبعا لما هتحدد المحتوى صح و تصمم محتوى مناسب نتائج حملاتك هيفرق كتير جدا جدا جدا

نكمل رحلة الفهم و المذاكرة و هنا هنعرف “ أنا إعلانى هيظهر فين ؟”

الفيسبوك و إنستجرام مثلا فيه حوالى 19 placements مختلفة و تقدر تجرب و تختار كل مكان تظهر فيه حسب إعلانك و هدفك من الإعلان و طبعا كل platform بيكون عندها نقطة قوة فى placements معينه مع العلم طبعا إن اوقات كتير هتلاقى نقاط تشابه كبيره بينهم و بين بعض

أنظمة ال bidding & Budgeting بالنسبة ليا هى بتكون عامل مهم بقدر أبنى عليه إستراتجيات مختلفة لأنك هنا بتحدد هتصرف كام و إزاى و تتحاسب إزاى و بناء على إيه

يعنى مثلا لو بنعمل إعلان لمشروع عقارى و مش متوفر عندنا غير فيديو واحد للمشروع “ هنفترض إن ده إللى موجود يعنى “ هنا إنت هتحتاج تجرب تغير الAd copy مع الإستهداف بتاعك مع تغيير الBudget

على الفيسبوك كمثال تقدر تجرب CBO على كامبين فيها اكتر من استهداف أو نفس الإستهدافات بس تلعبها ABO

و تحدد براحتك هتضيف Max bid ولا هتسيبها Auto …. ده يعتبر مش مثال على قد ما هو توضيح إن جزئية الBidding & budgeting يعتير لاعب خط النص إللى هيقدر يوزع الشغل بالطريقة إللى تجيب بيها أجوواااال كتير

و أخيرا بنوصل للObjectives لكل platform التيك توك مثلا هتلاقيهم 5 Objectives اساسيين

لكن فى الفيسبوك مثلا هتلاقيهم 3 أقسام رئيسية داخلهم 11 نوع فرعى و فى بعض الحسابات الإعلانية تم إعادة تقسيم الObjectives فيها مؤخرا

فهمك للObjectives الموجوده لكل منصه إعلانية بيساعدك و إنت بتحدد الخطة الإعلانية بتاعتك و بتحدد هتشتغل على إيه و إزاى و ليه

يعنى لو عايز تعمل lead generation يا ترى موجود على أى موقع منهم , و أى موقع فيهم هيقدر يقدملك العميل إللى إنت بتدور عليه

فى الختام احب أأكد إن كل واحد مننا ليه طريقته فى المذاكره أو تطوير نفسه , دى بالنسبة ليا الطريقة الثابته إللى ببدأ بيها أى platform جديدة و بعد كده بركز أكتر على التجربه العملية أو إنى اوصل لأفكار و إستراتيجات جديدة من اهل الخبره لأنى أكيد مش هقدر اجرب كل حاجة لوحدى و كل واحد فينا ليه عقليته و طريقته فى التنفيذ و كلنا نستفيد من بعض .