Category Archives: blog

Oct 24, 2023

هننشر 200 بوست فى الشهر !!

بص إحنا عايزين ننزل كل يوم بوستات .. و عايزين ننتشر فى كل وقت و كل مكان !!

الجملة دى بإختلاف طريقة صياغتها بنسمعها كتير من أصحاب شركات , و هنوضح إنهارده إيه هو التقييم المناسب للمحتوى الخاص بشركتك أو البراند الخاص بيك على السوشيال ميديا , بالشكل إللى يساعدك تزود من أرباحك.

1- أول و اهم خطوة و هى هدفك من المحتوى , أى محتوى بيكون سواء مكتوب او مرئى أو صوتى لازم يكون ليه هدف واضح و قابل للقياس , هل هتوجه العملاء للتواصل بيك عن طريق إيه ,.. الكومنتات أو الرسائل أو هتوجهم للموقع الخاص بيك

2- تانى خطوة و هى تعتبر تكملة للخطوة الأولى و هى ” هتنشر محتوى أو بوستات لمين ” مين هم عملائك , صفاتهم و طلباتهم و إهتمامتهم … قدر معرفتهم بيك و بمنتجك أو خدمتك؟

3- إختيار وسيلة التواصل المناسبة : طبعا إحنا هنا بنتكلم عن السوشيال ميديا , و حسب نوعية عملائك هتحدد شكل المحتوى و المنصة إللى هتنشر عليها المحتوى يعنى أكيد لو إنت براند ملابس شبابى مش هتعلن عن المنتج بتاعك على LinkedIN لكن على لينكدإن تقدر تستخدمه فى التوظيف أو إنك تنشر محتوى خاص بالشركه يساعدك على فتح علاقات جديده على مستوى الشركات و ليس الافراد

4 – خطة المحتوى الشهرى أو الربع سنوى , إنت هنا هيكون إعتمادك الاساسى على التقويم و تقدر تحدد المناسبات و الأعياد و الأحداث و إيه إللى تقدر تستفيد بيه و تدمجه فى المحتوى الخاص بيك و يكون مناسب للبيزنس و المنتج أو الخدمه

5- التنوع : حسب الخطوات إللى فاتت هتكون قدرت تحدد مين هم عملائك و المنصه المناسبة لشغلك و على الاساس ده هتقدر تقدم محتوى يناسب كل منصه و كل فئه بأشكال مختلفة و لازم تراعى إن يكون فى تنوع فى طريقة عرض المحتوى علشان تقدر تقييس و تحدد المحتوى المناسب ليك و يكون العائد منه أفضل

هنرجع هنا للسؤال الاساسى … ننشر كام بوست فى الشهر .!؟؟

الحقيقة مافيش رقم ثابت … و كل بيزنس ليه ظروفه و الميزانيه الخاصه بيه .. يعنى إيه !؟

يعنى إنت لو عندك 10 خدمات تقدر تنشر بوست لكل خدمه شهريا … بس تقدر كمان تحدد أهم 3 خدمات و تنشر لكل خدمه منهم 4 بوستات يعنى 12 بوست شهريا و حسب الميزانيه بتاعتك تقدر تطور فى شكل المحتوى … لأن مثلا المحتوى الفيديو و المصور تكلفته أعلى من التصميمات العاديه

و أهم نقطة إن المحتوى بشكل عام تكون قادر تقييسه و تتابعه و تقيمه بإستمرار … و هنوصل للقاعدة الأساسية ” المحتوى مش بالكمية .. المحتوى بدوره فى تحقيق اهداف البيزنس “

Jan 13, 2023

تعمل إيه وقت الأزمه؟؟

أحسن وقت تعدل و تطور من نفسك فيه هو وقت الأزمات و المشاكل

لان المفروض ده أفضل وقت عقلك عايز ينجو من المشكلة و بعيدا عن ال comfort zone بتاعته

و المفروض يكون مرن لاى حل ومش هيطول كتير فى التحليل و الحسابات الغير مجدية

فرصة تعدل من مشاكلك الذهنيه بس لو ركزت فى ده لكن لو سبت نفسك للندب و الاحباط مش هتتحرك خطوة لقدام

الفترة دى هى فترة الحركة فترة الأزمات اللى بيقعد و يندب فجاءة بيلاقى نفسه فى الأرض . مش هنفضل طول عمرنا نحلل الوضع السياسى و الاقتصادى المهم نتصرف ازاى !؟

✅هما طريقين يا تتحرك بشكل Horizontal او Vertical
🟩 يا تتحرك بشكل افقى و دى بتكون مناسبة بشكل كبير لاصحاب البيزنس او اللى معاه راس مال و المقصود بيها هو تنويع مصادر الدخل يعنى معاك راس مال شوف بتفهم فى ايه او تقدر تشغلهم في ايه و ابدا ، ان يكون عندك ٤ أو ٥ مصادر دخل مش متعلقين ببعض و فى صناعات مختلفة هيخليك مطمن و الضرر ما يبقاش كبير عليك مرة واحدة

🟩 النوع التانى من الحركة و هى اللى بتكون بشكل رأسى و دى مناسبة اكتر للافراد سواء شغالين بشكل دائم فى شركات او freelancers و هنا اعتمادك بيكون على تطوير امكانياتك و تحسين نتائجك الحالية علشان تطلع لشريحه اعلى و احسن فى مجالك

الافراد كمان يقدروا يتشغلوا و يتحركوا بشكل افقى حسب المجال او الامكانيات اللى معاه يعنى ممكن جنب شغلك تبدأ تبيع حاجات تانية اونلاين مثلا و هنا انت بتطور نفسك يعنى بتتحرك بشكل راسى و بتنوع مصادر دخلك يعنى بتتحرك افقى

👈ضرورة السعى ⬅️ تعنى حتمية الوصول لنتائج
و انت و شطارتك بقى تستخدم النتائج دى ازاى لراحتك
و لازم الأخذ بالأسباب و اكيد هتوصل لحاجة و الاحسن توصل لحاجة كويسة لكن هتقعد تندب مش هتوصل و هتقع كمان

الفترة دى علشان تشتغل و تضمن نسبة مكسب معقوله و مستمره لو ماعندكش خدمة أو منتج قوى و قادر يكتسب حصه فى السوق بشكل محترف هو إنك تشتغل فى حاجات معينة و هى

– الوساطه بكل أشكالها
– الصيانه ( صيانة عربيات , صيانة مبانى و إنشاءات) و كل أشكال الصيانه
– إنتاج المحتوى ( سواء محتوى لنفسك أو للغير )

شركات الدفع و التقسيط هى تعتبر شركات وساطه بس فى القطاع المالى و هنلاقى فى القطاع ده بس كمية شركات و تمويل و ارباح كبيره جدا جدا جدا

قطاع الصيانه حاليا مهم و ضرورى جدا و السبب الاساسى هو ان قرار شراء منتج جديد بقى صعب بسبب الغلاء و بقى قرار الصيانة ضرورى و مهم

اللى عنده عربيه هيهتم يعملها صيانه ، اللى عنده مبنى هيهتم بيصيانته علشان اى مشكلة هيكون تصليحها مكلف جدا و الاجهزة الكهربائيه كمان سعرها بيزيد فهيكون مهم و ضرورى الحفاظ عليها بحالة جيدة

و الجزء الثالث و اللى بيتطور تطور رهيب هو صناعة المحتوى , لو إنت صانع محتوى أو بتشارك فى عملية صناعة المحتوى فهيكون ليك نصيب كبير و قوى الفترة الحالية القادمة

#كونتنت_يستاهل تقرأه , تسمعه , تعمله شير 👉

Aug 12, 2022

ميسى كان لازم يمشى !!! و رجوعه مكاسبه رهيبه

ميسى كان لازم يمشى !!! و رجوعه مكاسبه رهيبه

و المقال ده و عنوان المقال بالشكل ده هو أكبر إثبات للجزئية دى .. يلا بينا أثبتلك ليه ميسى كان لازم يمشى .فى البداية و قبل ما تفكر أى فكرة مش فى مكانها … ميسى هو أفضل لاعب فى تاريخ الكرة .. هو أكثر لاعب أثر على الكرة بشكل عام و برشلونة بشكل خاص

من أول بداية ميسى مع برشلونة و الفريق كان فيه نجوم .. بس للاسف النجوم دى كانت فى نهاية مسيرتها و أدائهم بدأ يقل و فى المرحلة دى كان جوارديولا كمان بيبدأ حياته المهنية و بدئها بالإستغناء على كل من رونالدينيو,ديكو جودينسون.

و كان كمان عايز يمشى إيتو و يايا توريه بس ما عرفش فى اول موسم ليه

و فى المرحلة دى بدأ تصعيد شباب زى بيدرو و بوسكيتس , رجع بيكيه من مانشستر يونايتد و فى المرحلة دى بدأ ميسى يتحط على قمة الفريق بجانب بعض اللاعبين الأخريين إللى عليهم أمال كبيرة … تشافى و إنيستا ماكنوش نجوم ساعتها و ماحدش كان واخد باله منهم أوى .

الفريق بشكل عام كان بدون ضغوط و لكن عنده ال Potential إنه يبقى فريق قوى معتمد على الشباب إللى عندهم رغبه يحققوا حاجة و أبناء النادى إللى بيحبوا النادى و عايزين ينجحوا

بس مع مرور الوقت و المواقف الكتير إللى الكل عارفها مرورا بمدربين كتير حتى وصول إنريكى إللى قرر و حسب طبيعة التشكيلة إللى معاه إنه يعتمد إعتماد أساسى على الفرديات فى حضور الMSN و إللى كان بيدارى كتيييييييييير جدا على باقى عيوب الفريق ( كمثال بايرن ميونخ مع هانز فليك )

و سريعا كده بايرن ميونخ كان فيه بعض العيوب او نقاط الضعف اللى تقدر تلعب عليها لو معاك فريق محترم و ده ظهر فى مواقف كتير بس اللى كان بيفرق حودة لاعبى البايرن و ابرزها نكسه ماتش ال ٨

المقدمة دى كلها علشان تشوف سريعا شكل برشلونة و تغيير حاله من فريق جماعى إلى فريق بيعتمد على الفرديات و مع هبوط مستوى غالبية الفريق جماعيا بقى ميسى هو الوحيد إللى عنده القدرة الفردية على عمل الفارق فى المباريات كلها .

و فى نفس الوقت مافيش مدرب قوى فنيا و إداريا يقدر يمسك فريق فيه المشكلة دى لازم يكون عندك أعمده تبنى عليها الفريق بشكل مناسب يعنى فرديات لبعض اللاعبين و جماعيا الفريق يكون متزن

فى برشلونة 2009 و حتى 2011 حارس المرمى كان فالديس هو أكيد اقل من شتيجن , ابيدال كان أقل من أغلبية الأظهرة فى وقته , بس باقى الفريق كان شبه متكامل لكن حاليا الفريق كله واقع

نسبة مشاركه ميسى فى الأهداف فى برشلونة أخر 3 سنوات مرعبه .. على قد ما هى بتثبت قوة و سطوة ميسى على الكرة العالمية هى فى نفس الوقت بتوضح تأثير ميسى على برشلونة

و هنا الحل يا اما تجيب لاعبين مستواهم عالى .. و هنا هيكن نسبة مشاركتهم فى إنجازات الفريق مش زى ميسى بس تكون النسب متوازنه

ميسى حقق أعلى معدل تهديف ليه مع تيتو فيلانوفا بمتوسط 1,20 هدف لكل مبارة و ده يعتبر أعلى معدل ليه مقارنة باقل معدل مع كيكى سيتين و بعده الموسم الماضى مع كومان بمعدل 0,81 هدف لكل مبارة الارقام دى بتوضح حاجات مهمة جدا زى , سوء مستوى الفريق بشكل عام لضعفهم لتوفير عدد الفرص المناسبة للتسجيل , سوء التوظيف و الإستخدام من المدرب و طبعا عامل السن مؤثر جدا

فى بداية الموسم السابق برشلونة الموسم ده سجل 22 هدفًا بعد مرور أول 18 مباراة، الموسم إللى فات بعد مرور نفس عدد المباريات أحرز الفريق 41 هدفًا! و هنا بيظهر تأثير ميسى الجبار على رفع كفاءة الفريق

كل العوامل و المؤشرات دى بتاكد إن برشلونة لازم كان يبنى فريق قوى للحفاظ على ميسى أو الحل الأصعب زى ما قولنا و هو الإستغناء على ميسى يكون بناء الفريق على مستوى واحد سواء فنيا أو ماديا

كان ممكن الوضع يختلف لو الفريق منظم ماليا و إداريا يعنى مافيش عندم لاعب زى كوتينيو بياخد أكتر من 20 مليون فى الموسم و هو مش بيلعب اساسا او ديمبيلى ” العضو الدائم فى المستشفى ” إللى بياخد حوالى 17 مليون فى الموسم و هو حصيلة إللى قدمه للنادى خلال المواسم كلها حوالى 40 هدف يعنى لاعيبه مافيش ليها أى تأثير أو إضافة.

و قرار إن ميسى لازم يمشى هو بنسبة كبيرة كان أكثر قرار صعب مضطر تاخده كنادى … زيه زى قرارات كتير فى حياتنا بتبقى صعبه و مرهقة سواء تنفيذها أو حتى ما بعد ما بتنفذها علشان تتعافى من تاثيرها عليك.

و هنا هنكون وصلنا إن ميسى فعلا رحل و لابورتا رجع يفتح كلام و يحاول يلطف الأاجواء لرجوع ميسى بعد إنتهاء عقده مع باريس سان جيرمان

و هنا هنسأل سؤال مهم .. ليه كان رحيل ميسى مهم أو ضرورى فى المرحلة دى و ليه رجوعه هيكون ليه مكاسب !؟؟؟

نفس الأسباب الفنية إللى تم ذكرها هى نفس أسباب رجوع ميسى , فريق برشلونة حاليا بدأ يستقر فنيا و ماديا و الفريق هيحتاج نجم أسطوره يحافظ على تكاتف المجموعه بجانب مصدر اساسى و رهيب للأموال

برشلونة بعد الرافعات الإقتصاديه قدر يجخل أكتر من 700 مليون للنادى مقابل بيع أجزاء من أصول النادى

و لكن هتكون المهمه القادم هى الحفاظ على قوة النادى إعلاميا للمحافظه على معدلات دخل كبيره علشان تبعد النادى عن أى مشاكل مستقبليه

ميسى مع باريس سان جيرمان قدر يدخلهم 700 مليون دولار لوحده !!!!

رقم رهيب و مرعب , أيضا حسب تصريحات ” مارك أرم سترونج مدير عقود الرعاية فى النادى إن قمية عقود الرعاية كانت بتتراوح بين 3 ل 5 مليون دولار بعد قدوم ميسى اصبحت تتراوح بين 5 ل 8 مليون دولار

قدوم ميسى لباريس سان جيرمان ساعد فى الحصول على 10 عقود رعاية جديدة بجانب إنه ساعد فى زيادة دخل النادى بنسبة 13% !!!!

باريس سان جيرمان فى أول 7 دقائق من التعاقد مع ميسى رسميا تم بيع 150,000 قميص عليه رقم ميسى

و بعد أول 24 ساعة الPSG باعوا أكتر من 832,000 تيشيرت لميسى

و للعلم إن عوائد بيع التيشيرتات مش كلها بتروح للفريق فى حالة باريس سان جيرمان فى إتفاق مع NIKE إنه يحصلوا على 80 مليون يورو سنويا زائد نسبة من المبيعات.

و بعض التقارير كانت تشير إن برشلونه خسر برحيل ميسى 173 مليون دولار من قيمته !!!

دى كانت أرقام الأموال أما بالنسبة لتاثير ميسى إعلاميا فباريس سان جيرمان قدر يحصل على 15 مليون متابع جديد على حسابات الفريق على مواقع التواصل الإجتماعى المختلفه فور وصول ميسى

و كان أول فريق أو علامه تجارية رياضية توصل ل10 و 20 مليون متابع على تيك توك

فور وصول ميسى عدد متابعين حساب الPSG على إنستجرام كان حوالى 38 مليون و وصل ل 61 مليون متابع

دى أرقام ميسى لوحده و تأثيرها على باريس سان جيرمان و إللى مهما كان قوته و جماهيريته مش زى برشلونه …. تخيل القوة دى مع برشلونة و مع شخص ذكى زى ماتيو اليمانى

ميسى قادر يضيف لبرشلونه كتييييير سواء فنيا أو مادياً

ميسى كان لازم يمشى … و رجوعه هيبقى كله مكاسب