لماذا يفشل التسويق أونلاين؟

التسويق أونلاين بيفشل … و هيفشل 📉 !!!

شركات كتير بتبدأ شغلها و إعتمادها الأساسى على التسويق أونلاين و بالتحديد على السوشيال ميديا و لكن بعد فترة و بعد صرف فلوس كتير أو حسب كل بيزنس و ميزانيته بيلاقى إن مافيش نتيجه 🤔🤔

و الحقيقة إن ده بيكون نتيجه طبيعيه لأن حاليا المنافسه بقت قوية جدا فى كل المجالات و و المعروض من كل منتج و خدمه كتير و العميل بقى معاه رفاهية إنه يختار إللى يناسبه أو إللى هيقدر يفوز بثقته

إحنا قدرنا نلخص الاسباب الرئيسية إللى هتأثر على البيزنس بتاعك و تأخر تطوره , 👈 و هى 4 أسباب رئيسية لازم تخلى بالك منهم لو إنت هتبدأ بيزنس جديد أو حتى عندك بيزنس و عايز تطوره و تكبره .

🔖1- الخطه : صعب تسافر أى مكان جديد و إنت مش محدد خططك و هتسافر إزاى و لما تعدى من كل بلد و كل مرحله هتعمل إيه , لازم كل بيزنس يكون ليه خطه و داخل الخطة دى يكون محدد تسويقيا هيعمل إيه .

و المقصود هنا تسويقيا سواء Offline أو Digital و بناء على الخطة إللى إنت محددها هتحدد هتعمل إيه و هتصرف قد إيه .. و خليك فاكر إنت مش لازم فى البداية تعمل خطة جبارة و 200 صفحة … يكفى إنك تحطط الخطوط العريضه و إبدأ إتحرك ✌️

🔖 2- الإستمرارية : أهم عنصر فى خطتك و شغلك إنك تكون مقرر إنك لازم تستمر و لازم تكون ليك أنشطة تسويقية على مدار السنة , مش شرط تكون كل الأانشطة التسويقية بنقس المستوى أو بنفس الإنتشار ولكن كل خطوة لازم تكون ليها غرض . و هنا هنقول مثال علشان نوضح الفكرة

✅ مثال إنت محل حلويات , هتحدد فى خطتك إنك عندك مواسم طول السنة زى رمضان و الأعياد و رأس السنة و المواسم دى هى فترة الأنشطة و الحملات التسويقية الرئيسية , و إللى بيكون فيها شغل كتير و صرف فلوس كتير.

بس باقى السنة هل بنوقف تسويق أو دعاية !!؟

أكيد لا و لكن ممكن نقلل شوية و نبدأ نوصل لعملاء جديدة و نبنى لفترة الموسم إللى جاية و بتكون فترة مناسبة جدا تقوى كمان علاقتك مع العملاء الحاليين .

يعنى كفكرة إنك تقدر تعمل خصومات و عروض لعملائك الحاليين و تبعتها سواء عن طريق رسائل SMS او عن طريق صفحتك على الفيسبوك.

⬅️ الافكار إللى ممكن نعملها فى مرحلة الإستمرارية كتير و بتختلف حسب كل مجال و هنستنى منكم فى الكومنتات أفكاركم و بتعملوا إيه فى الفترات إللى خارج الموسم

🔖3- الترابط : إنت ممكن تكون بيزنس قائم 100% أونلاين سواء بتبيع خدمه أو منتجات أونلاين … ولكن هل العملية بالكامل بتتم أونلاين ولا أوفلاين !!؟؟

يبقى هنا لازم يكون فى تواصل و ترابط بين الشغل و الافكار إللى بتم أونلاين و بين إللى بيتم أوفلاين … و هنقول مثال هنا علشان نوضح الفكرة أكتر

✅ مثال : هنفترض إنك شركة عقارات و طبعا شغلك أونلاين معتمد على إعلانات الـ Lead Generation هنا لازم يكون فى ترابط و تواصل بين فريق العمل إللى شغال أونلاين و بين فريق المبيعات إللى فى الشركه علشان يقدروا يحددوا جودة الـLead علشان نقدر نحسن الحملات الإعلانية بشكل أفضل

و فى نفس الوقت ممكن فريق التسويق أونلاين يطلب صور أو فيديوهات من فريق المبيعات أو من ممثلين الشركه و ده بيكون برغض تحسين الحملات الإعلانية

يعنى الترابط و التواصل ضرورى و مهم جدا و أى تقصير فيه بيأثر على الشغل ة نتيجته بشكل عام

🔖 4 – المرونة : إنت كصاحب بيزنس مطلوب منك تكون مرن بقدر كبير سواء مع متغيرات السوق أو متطلبات التسويق , و هنوضح الفكرة بمثال علشان تبقى واضحه أكتر

✅ مثال : لو إنت عندك بيزنس ملابس , ايا كان سواء رجالى أو حريمى و سواء عندك محل أو بتبيع أونلاين بس

لو هنفترض إنك شغال من 5 سنين .. الوقت ده ماكنش فيه تيك توك و Reels و فيديوهات لايف بالكمية دى .

لو مش هتبقى مرن و تنوع من طريقة عرض شغلك مش هتكبر , و علشان تكون مرن هنا و لو إنت بتعمل كل حاجة بنفسك , إشترى حامل للموبايل و ring light أو ظبط إضاءة المكان إللى هتصور فيه و صور منتجاتك بإستمرار علشان تواكب التغيير السريع إللى بيحصل

لأن زى ما إتكلمنا فى البداية إن المنافسه قوية و المعروض كتير و العميل قدامه فرصه كبيره يبحث و يختار براحته

Leave a Comment

Your email address will not be published.