صناعة القرن!!؟؟

طبيعى جدا تكون هى صناعة القرن , صناعه قدرت الشركات فيها خلال 2021 تحقق ارباح بالمليارات , يكفى أقولك إن فى شركة منهم خلال عام 2021حققت أرباح بقيمة 7,7 مليار دولار و ده أكثر بنسبة 27% عن عام 2020

صناعة فيها ضخ لأموال و إستثمارات بأرقام كبيره جدا و المنافسه فيها بقت كل يوم أصعب من إللى قبله , هنبدأ سلسلة ” صناعة القرن بالأرقام و الإحصائيات و الرؤية الشاملة للصناعة دى و بعد كده هندخل فى التفاصيل أكثر و أكثر.

و علشان ما تزهقش منى و تكمل للأخر .. الصناعة إللى بتكلم عليها هى ” صناعة و إنتاج المحتوى “

حاليا العالم كله من وجهة نظرى بيتمحور حول صناعة المحتوى , منصات عالمية زى HBO و HBO Maxو إللى كانت صاحبة الارباح الكبيره إللى قولناها فى البداية وغيرها من المنصات زى Netflix طبعا و HuLu و Disney Plus و فى منصات أجنبية و عالمية تانية بس مش متواجده فى الشرق الأوسط و فى منصات عربية زى Shahid و WatchIT

و دى المنصات إللى مكسبها و ربحها الأساسى بيكون عن طريق الإشتراكت الشهرية و السنوية , طبعا كل منصة منهم بتختلف فى جودة المحتوى أو بمعنى أصح المحتوى الحصرى إللى فى الغالب بيكون من إنتاجها و سعر الإشتراك أو مميزات أخرى تقدر تكسب بيها عميل جديد

لكن منصات تقديم المحتوى بشكل عام كتير و الأكثر منها إللى مش بيعتمد على الإشتراكات بس زى الYouTube مثلا إللى بيعتمد فى جزء مؤخرا على الإشتراكات علشان تقفل الإعلانات و بعض المميزات الاخرى أو الإعلانات كمصدر ربح

لو حللنا منصات و مواقع التواصل الإجتماعى كلها هنلاقيها الهدف الأساسى بتاعها هو إنتاج و إستهلاك المحتوى و لأنها منصات تعتبر مجانية فبيكون إعتمادها فى إنتاج المحتوى على الUserو إللى بنسميه USG – User Generated Content

علشان كده بيغيروا دايما من التكنولوجيا و الAlgorithm بتاعهم بغرض اساسى و هو إنهم ياخدوا من وقتك أكبر قد ممكن و ده سبب أساسى فى دعم صناع المحتوى سواء بهدايا أو بنظام ربح من الإعلانات زى ما اليوتيوب بيعتمد بشكل أساسى

بس هنا هنسأل سؤال مهم , إيه إللى يخلى صناعة المحتوى هى صناعة القرن .. العنوان ده فى تضخيم شوية لصناعة عادية يعنى ولا ايه

يعنى مثلا صناعة زى صناعة السيارات دى صناعة صغيره !؟؟

الحقيقة فى صناعات كثير بتحقق أرباح جبارة جدا مثال إن لو خدنا شركة زى BMW كانت أرباحها فى 2021 حوالى 131 مليار دولار طبعا ده رقم جبار و كبير جدا إنك تقارنه بأى منصه لإنتاج المحتوى بس الغرض هنا إننا ناخد بالنا من معدلات النمو فى الصناعة و تاريخ الشركات بجانب بعض الأسباب الاخرى و هنوضحها فى نقاط علشان نقدر نحصرها .

سهولة الدخول فى الصناعة , سواء كنت منصه كبيره أو فرد واحد تقدر تبقى صانع محتوى و تكسب ملايين الدولارات شهريا و سنويا.

التطور الرقمى بيسهل عملية إنتاج و إنتشار المحتوى , يعنى إنت دلوقتى تقدر من أوضه صغيره تنتج مجموعه من البرامج إللى تساع

تواجد Generation Z و إللى بقى مُتطلب جدا لأشكال محتوى جديده

زيادة طلب الشركات للإعلانات بيحتاج محتوى يمر عن طريقه

وجودة أنظمة ربح لصناع المختوى و إللى بتشجع على صناعة محتوى أكثر

صناعة المحتوى بشكل عام هى عصب أى صناعة أو تجارة حاليا سواء المحتوى بيتم إنتاجه نشره رقميا أو على قنوات أخرى مختلفة زى الراديو و التليفيزون و الكل يتنافس على الحصول على أطول فترات مشاهده.

يعنى نقدر نقول إن ” إنتباهك ” هو الهدف الاساسى لكل المنصات و الشركات , لأن أى بيزنس لو عايز يبيبع منتج لازم يعمله محتوى و لو عايز تبيع خدمه هتعلمها محتوى , لو عايز توصل معلومه أو فكرة هتعمل محتوى.

و ده بسبب رئيسى و هو إن المحتوى يمكن إنتاجه بأثكر من شكل

محتوى مكتوب زى المقالات و إللى بتكون موجوده فى أكثر من مكان زى ( الصحف أو المواقع أو مواقع السوشيال ميديا أو قوائم البريد )

محتوى مسموع و أقدم مثال ليها هو الراديو و حاليا إنتشر البودكاست و إللى اصبح وسيلة قوية جدا فى بناء علاقه قوية مع الفئة المستهدفه

محتوى مرئى و ده ممكن يكون فيديو أو صور و طبعا ده بيكون اقوى نوع محتوى فى توصيل المعلومه أو الوصول للهدف.

أمثلة إنتاج محتوى لتمرير رسائل معينة أو إعلانات بقى ليها صور و أشكال كتير جدا و ده سبب أساسى إنى اقول إن صناعة المحتوى هى ” صناعة القرن و هوضح ده فى مثال لتوضيح الفكرة أكثر

و هناخد مثال هنا بكرة القدم ,أى فريق كرة قدم إيه هدفه من إنه يلعب كل أسبوع مبارة أو إتنين ؟؟

أكيد هو الفوز بالبطولات و العائد المادى … طيب إيه هى أكثر الفرق مشاهده على مستوى العالم … ؟؟

هى الفرق إللى بتقدم شكل جديد و ممتع من كرة القدم و فى نفس الوقت عندها لاعبين عليهم طلب إعلاميا

و خلال المباريات و إللى هى شكل من أشكال المحتوى الترفيهى بيتم إضافة إستديوهات تحليلية و إللى بتزود وقت المشاهده و إللى بالتبيعه بتزود معدل ظهور الإعلانات خلال فترة إذاعة المبارة .

بس هنا نقدر نقول و إيه الجديد طول عمرنا بنشوف مباريات و إعلانات سواء بين الشوطين أو أحيانا خلال المبارة

بس كان الجديد هو ظهور تقنيات جديدة من الإعلان زى تقنية الDBRLive و إللى كنت إتكلمت عليها قبل كده ” هسيب لينك البوست فى الكومنتات “

 التسويق الرياضى وأعلانات ماتشات الكورة تسويق إلى أبعد مدى مع تقنية ال DBRLive

حاليا العالم كله بيتابع كأس العالم و إحنا كشرق اوسط مصدرنا الرسمى الاساسى لمشاهده مباريات كاس العالم هو BeinSport بس مؤخرا ظهر لاعب جديد إسمه TOD Tv و دى منصة زى Netflix كده و زياده عليها إن تقدر تتابع و تشاهد المباريات مباشرة و بإشتراك شهرى بس الجديد بقى إن TOD هى أحد مشاريع Bein و تعتبر طريقه مختلفة من العملاق القطرى للحصول على شريحه أكثر من السوق إللى رافض الإشتراك فى باقات Bein لأى كان السبب سواء السعر أو إنه تقسيم الباقات .” مرفق صورة فى الكومنتات “

توجه Bein و أى منصة أو قنوات لإنتاج محتوى رقمى هو أكثر تأكيد إن قوتك فى صناعة المحتوى بيزيد من قوتك فى السوق ,و تطوير منصات التواصل الإجتماعى الهدف الاساسى منه هو زيادة عدد الAds Placements داخل كل منصه و إللى بالتبعيه بيزيد من فرص تحقيقها للأرباح , هتلاقى فى الكومنتات بوست تانى إتكلمت فيه عن قوة الـ Placements

صناعة القرن و إللى هى صناعة المحتوى فيها تفاصيل كثير علشان كده مش بوست واحد هيكون كافى لتغطية كل جزء فيها بس نختم المرة دى بمعايير المحتوى القوى و إللى تقدر تنافس بيه

1- يكون محتوى يقدم قيمة أو عائد على الشخص المٌتلقى ( مش شرط يكون معلومه إنت لو بتقدم محتوى كوميدى هيبقى كفاية إنه يضحك )

2- يكون محتوى قابل لإعادة التدوير, و دى جزئية فيها أفكار كتير بس هنوضح الفكرة بالمقال ده ” أنا دلوقتى أقدر أعيد إستخدام المقال ده فى شكل فيديو سواء فيديو طويل أو Shorts علشان تناسب منصات مختلفة , و اقدر اسجله كصوت فقط و إستخدمه فى Poadcast و بعد فترة أقدر أقسم المقال و أنشرالمعلومات إللى موجوده فيه على شكل بوستات قصيره. و كده ده محتوى قابل لإعادة التدوير

3- يكون قابل للقياس , و طبعا هنا مافيش أحسن من المحتوى الرقمى و إللى بتقدر تقيس أى تفاعل تم على المحتوى الخاص بيك بكل تفاصيل و طبعا ده سبب أساسى فى رغبة شركات كبيره فى التحول للمحتوى الرقمى .

4- إمكانية إعادة الإستهداف و طبعا مافيش أقوى من المحتوى الرقمى فى إعادة الإستهداف بشكل عام , إنت لو عندك فيديو قوى و قدمت فيه كعلومه معينة تقدر تعيد إستهداف الناس إللى شاهدت الفيديو أو جزء منه لعرض خدمة أو منتج جديد يكون من ضمن إهتماماتهم.